भरतपुर। रौतहटबाट काठमाडौंतर्फ जाँदै गरेको यात्रुबाहक बस चितवनमा दुर्घटनमा हुँदा २० जना घाइते भएका छन् । पूर्वपश्चिम राजमार्गअन्तर्गत राप्ती नगरपालिका–२ गड्यौलीमा रौतहटबाट काठमाडौंतर्फ जाँदै गरेको बा प्र ०१–००६ ख २००४ नं यात्रुबाहक बस गए राति सडक छेउमा रोकिराखेको प्र २०३–००१ ख ७३१२ नं को ट्रकसित ठोक्किएर दुर्घटना भएको प्रहरीले जानकारी दिएको छ ।

घाइते सबै बसका यात्रु रहेको जिल्ला ट्राफिक प्रहरी कार्यालय चितवनका प्रमुख सुरेश सुवेदीले जानकारी दिनुभयो । घाइतेमध्ये दुई जनाको अवस्था गम्भीर रहेको छ । घाइतेको चितवन मेडिकल कलेज भरतपुरमा उपचार भइरहेको छ । बसका चालक फरार रहेको र खोजीकार्य जारी रहेको प्रमुख सुवेदीले बताउनुभयो । दुर्घटना भएको थाहा भए लगत्तै स्थानीय र प्रहरीको टोलीले उद्धार गरेको थियो । दुर्घटना बारे थप अनुसन्धान भैरहेको प्रहरीले जनाएको छ ।