रुकुम पश्चिम । रुकुम पश्चिममा डेढ वर्षको छोरीलाई सलको पासो लगाएर मार्न खोजेको आरोपमा आमा पक्राउ परेकी छिन् ।

आफ्नै डेढ वर्षकी छोरीलाई पासो लगाउने मुसिकोट नगरपालिका वडा नम्बर १४ लोरिबाङकी अन्दाजी २१ वर्षीया नन्दकली विष्टलाई पक्राउ गरेको जिल्ला प्रहरी कार्यालय रुकुम पश्चिमका प्रहरी नायब उपरीक्षक नवराज पोखरेलले जानकारी दिनुभयो ।

नन्दकलीले मंगलबार आफ्नी डेढ वर्षकी छोरी टीका ओलीलाई आफू सुत्ने कोठामा सलले झुन्ड्याएर भिडियो बनाएकी थिइन् ।

नन्दकलीले नाबालक छोरीलाई पासो लगाइदिएर बनाएको भिडियो वैदेशिक रोजगारीको सिलसिलामा दुबईमा रहेका उनका श्रीमानलाई पठाएकी थिइन् ।

यस्तो भिडियो देखेपछि श्रीमानले विदेशबाट तुरुन्तै घरका अन्य सदस्य र छरछिमेकलाई खबर गरेका थिए । छिमेकीहरू तत्काल विष्टको घरमा पुगेर पासो लगाएकै अवस्थामा भेट्टाएका थिए ।

उनीहरुले तुरुन्तै बालिकाको उद्धार गरेका थिए । ती बालिकाको अहिले जिल्ला अस्पताल सल्लेमा उपचार भइरहेको प्रहरीले जनाएको छ ।

नन्दकलीविरुद्ध आवश्यक प्रक्रिया पूरा गरी कारबाही गर्ने प्रहरीको भनाइ छ ।