हेटौंडा । मकवानपुरको मकवानपुरगढी गाउँपालिकाको धवाडीपुलमा मोटरसाइकल दुर्घटना हुँदा एकै परिवारका तीन जनाको ज्यान गएको छ । सडक दुर्घटनामा परी ज्यान गुमाउनेमा एकैघरका आमाबुबा र छोरीको ज्यान गएको हो ।

मोटरसाइकल दुर्घटनामा मृत्यु हुने मोटरसाइकल चालक मकवानपुरगढी गाउँपालिका-२ निवासी ३५ बर्षीय भिम बहादुर स्याङतान, मोटरसाइकलको पछाडी सवार ३४ बर्षीया रुपा स्याङतान र उनकी ५ महिने छोरीको मृत्यु भएको मकवानपुरका प्रहरी प्रवक्ता एवम् प्रहरी नायव उपरीक्षक लक्ष्मी भण्डारीले जानकारी दिनुभयो ।

दुर्घटनामा गम्भीर घाइते भएका भिम बहादुर स्याङतानलाई उद्धार गरी हेटौंडा अस्पताल ल्याईएकोमा थप उपचारका लागि पुरानो मेडिकल कलेज भरतपुर चितवन लैजादै गर्दा बाटोमानै मृत्यु भएको प्रहरीले जनाएको छ ।

मोटरसाइकलको पछाडि बसेकी ३४ वर्षीया भीमबहादुरकी पत्नी रुपा स्याङतान र उनकी पाँचमहिने छोरीको घट्नास्थलमै मृत्यु भएको मकवानपुर प्रहरीको भनाइ छ ।

मकवानपुरको सुकौराबाट कान्तिलोकपथ तर्फ आउँदै गरेको प्रदेश ३-०२-०१२ प ६९११ नम्बरको मोटरसाइकल बिहिवार दिउँसो आफै अनियन्त्रित भएर धवाडीपुल छेउमा दुर्घटना भएको भएको हो । मोटरसाइकल सडकबाट करिब १२ मिटर तल खसेको थियो ।