प्युठान । नेपाली कम्युनिष्ट पार्टी झिमरुक गाउँपालिका कमिटीले दुई महिने राष्ट्रिय जागरण अभियान सुरु गरेको छ । नेकपाले आफ्नो पार्टीको संगठन विस्तार, सुदृढीकरण र जनतासँगको सम्बन्धलाई थप मजबुत बनाउने उद्देश्यसहित शनिबार अभियानको उद्घाटन गरिएको हो ।

झिमरुक गाउँपालिका–५ मच्छीस्थित पार्टीको गाउँपालिका कमिटी कार्यालयमा आयोजित कार्यक्रमको उद्घाटन नेपाली कम्युनिष्ट पार्टीका केन्द्रीय सदस्य तथा झिमरुक गाउँपालिकाका अध्यक्ष पितबहादुर महतरा क्षेत्रीले गर्नुभएको हो ।

उद्घाटन कार्यक्रममा बोल्दै महतरा क्षेत्रीले जागरण अभियानको सुरुवात आफैंबाट गर्नुपर्ने बताउनुभयो । उहाँले विगतका गल्ती तथा कमजोरीको आत्मसमीक्षा गर्दै सच्चिएर जनताको घरदैलोमा पुग्नुपर्ने आवश्यकता औंल्याउनुभयो ।

‘यो अभियानमा हामीले सबैभन्दा पहिले आफैंलाई जागृत बनाउनुपर्छ,’ उहाँले भन्नुभयो, ‘जनताको घरदैलोमा पुगेर आफ्ना गल्ती र कमजोरीको आत्मसमीक्षा गर्ने, सच्चिने र संगठनलाई बलियो बनाउँदै अघि बढ्ने बेला आएको छ ।’
उहाँले संगठन सुदृढीकरणका लागि नेता तथा कार्यकर्ता एकताबद्ध भएर लाग्नुपर्नेमा जोड दिँदै अभियानमार्फत सरकारका कामकारबाहीमाथि खबरदारी गर्न र आगामी स्थानीय तथा प्रदेश निर्वाचनको तयारीमा जुट्न आग्रह गर्नुभयो ।

अभियानका क्रममा विभिन्न वडा तथा पालिकास्तरीय भेला आयोजना गर्ने, पार्टीको संगठन विस्तार र सुदृढीकरण गर्ने तथा युवाको सहभागिता बढाउने विषयलाई प्राथमिकता दिइने गाउँपालिका कमिटीले जनाएको छ ।

पार्टीले संगठनात्मक गतिविधिलाई व्यवस्थित र जनमुखी बनाउन वडा अधिवेशन र पालिका अधिवेशनसमेत जागरण अभियानकै क्रममा सम्पन्न गर्ने योजना बनाएको छ । स्थानीय तहको निर्वाचनपछि जिल्ला, प्रदेश र राष्ट्रिय अधिवेशन गर्ने तयारीसमेत पार्टीले गरेको छ ।

कार्यक्रममा नेपाली कम्युनिष्ट पार्टीका केन्द्रीय सदस्य मिलन एमसी, केन्द्रीय सल्लाहकार कमिटी सदस्य श्रीकृष्ण रिजाल, लुम्बिनी प्रदेश कमिटी सदस्य तुलस बस्नेत, बसन्तराज पोख्रेललगायत वडा तथा पालिका कमिटीका नेता–कार्यकर्ताको उपस्थिति रहेको थियो ।

नेपाली कम्युनिष्ट पार्टी झिमरुक गाउँपालिका कमिटीका संयोजक झकबहादुर जिसीको अध्यक्षतामा सम्पन्न कार्यक्रमको सञ्चालन प्रेम पुनले गर्नुभएको थियो ।