प्युठान। मल्लरानी गाउँपालिका–४ खलङ्गाका एक दम्पतीले ८४ वर्ष पुगेको अवसरमा सामाजिक कार्य गरेका छन् । जुक्त प्रसाद पोख्रेल र धना कुमारी पोख्रेलको चौरासीको अवसरमा पर्यटकीय स्थल मल्लरानीमा ‘बाघमुखे चुलेसी’ को स्तम्भ निर्माण गर्नुभएको हो ।

प्युठानमा मात्रै बन्ने प्युठानी बाघमुखे चुलेसी लोप हुँदै गएको र त्यसको प्रतिक सहितको स्तम्भ निर्माण गरिएको छोरा डोर प्रसाद पोख्रेलले बताउनुभयो । पर्यटकीय क्षेत्रको रुपमा विकास हुँदै गएको मल्लरानीमा परिवारको तर्फबाट बुवाआमाको चौरासी पुँजाको साटो सामाजिक कार्य गरेको उहाँले बताउनुभयो ।

मल्लरानीमा आराम गर्नका लागि कुर्चिको व्यवस्था र वरपिपल समेत रोपिएको पोख्रेलले जानकारी दिनुभयो । परिवारको सल्लाह अनुसार भोजभतेर र फजुल खर्च नगरी सामाजिक कार्य गरिएको उहाँको भनाई छ । निर्माण गरिएको संरचनाको संरक्षणका लागि पालिकालाई हस्तान्तरण गरिएको पोख्रेलले बताउनुभयो ।

बाघमुखे चुलेसीको स्तम्भ उद्घाटन गर्दै मल्लरानी गाउँपालिका अध्यक्ष कृष्ण बहादुर खड्काले पर्यटकीय क्षेत्र मल्लरानीमा व्यक्तिगत तर्फबाट भएको संरचना निर्माणले थप योगदान पुगेको बताउनुभयो । उहाँले पालिकाले मल्लरानीसम्म पुग्ने कालोपत्रे मोटरबाटो निर्माण गरेको र मल्लरानी क्षेत्रमा विभिन्न संरचना निर्माणको काम भइरहेको जानकारी समेत दिनुभयो ।