दाङ । दाङको गढवा गाउँपालिका स्थित पुर्व-पश्चिम राजमार्ग अन्तर्गत कालाकाटेको जुरौनी भन्ने स्थानमा रात्रीबस दुर्घटना हुँदा तीन जना घाइते भएका छन् ।

मंगलवार दाङको तुलसीपुरबाट काठमाडौंको लागि छुटेको प्रदेश ३–०१–००६ ख ०९७४ नम्बरको ब्लयु स्काइ रात्रीबस गढवा गाउँपालिका-१,मा राती करिब पौने १० बजेतिर जुरौनीमा दुर्घटना परेर तीन जना घाइते भएको दाङ प्रहरीले जानकारी दिएको छ ।

प्रहरीका अनुसार एक्कासि बस अनियन्त्रित भई सडक भन्दा ५ मिटर दायाँ गई सालको रुखमा ठोक्किएर दुर्घटना भएको हो । दुर्घटनामा परी घाइते तीन जनाको उपचार भैरहेको र अवस्था सामान्य रहेको छ ।

घाइते हुनेहरुमा दाङ तुलसीपुर उपमहानगरपालिका वडा नम्बर १९ बस्ने २१ वर्षीय आस्था पौडेल, तुलसीपुर उपमहानगरपालिका बस्ने २२ वर्षीय बाबुराम लामीछाने र लमही नगरपालिका वडा नम्बर ५ बस्ने ४८ वर्षीय बबिता शाही रहेको प्रहरीले जनाएको छ । घाइतेको छाती, टाउको, हातखुट्टा र ढाडमा सामान्य चोट लागेकोले उहाँहरुको स्थानीय अस्पतालमा उपचार भैरहेको प्रहरीले जानकारी दिएको छ । उक्त बसमा ४० जना यात्रु सवार रहेको जनाइएको छ। घाइते बाहेक अन्यलाई बसमा राखेर गन्तव्यमा पठाइएको छ।