दाङ । लुम्बिनी प्रदेशका मुख्यमन्त्री चेतनारायण आचार्यले सामाजिक सद्भाव, राष्ट्रिय एकता र लोकतान्त्रिक मूल्य मान्यतालाई सुदृढ बनाउँदै समृद्धिको साझा लक्ष्यमा अघि बढ्न सबैलाई आग्रह गर्नुभएको छ । छठ पर्व-२०८३ को अवसरमा आइतबार शुभकामना सन्देश जारी गर्दै उहाँले मुलुकले सामना गरिरहेका राजनीतिक, सामाजिक तथा आर्थिक चुनौतीको समाधान आपसी संवाद, सहकार्य र साझा समझदारीबाटै सम्भव हुने बताउनुभएको हो ।
मुख्यमन्त्री आचार्यले छठ पर्वले प्रकृति र मानवबीचको सम्बन्धलाई प्रगाढ बनाउनुका साथै समाजमा समानता, सद्भाव, सहिष्णुता र एकताको भावना विकास गर्न प्रेरित गर्ने उल्लेख गर्नुभएको छ । सूर्यले कुनै भेदभाव नगरी सबै प्राणीलाई समान रूपमा प्रकाश, ताप र ऊर्जा प्रदान गरेझैँ समाजमा पनि समानता र सहकार्यको भावना विकास गर्नुपर्ने उहाँको भनाइ छ ।
उहाँले छठ पर्वलाई प्रकृति र सूर्यप्रति श्रद्धा, आस्था तथा कृतज्ञता प्रकट गर्ने विशिष्ट सांस्कृतिक एवं धार्मिक पर्वका रूपमा व्याख्या गर्नुभएको छ । अस्ताउँदो र उदाउँदो सूर्यलाई अर्घ दिएर पूजा आराधना गर्ने परम्पराले प्रकृति संरक्षण, अनुशासन, निष्ठा, त्याग र समर्पणको महत्व उजागर गर्ने उहाँले बताउनुभएको छ ।
परम्परागत रूपमा तराई र मधेश क्षेत्रमा विशेष उत्साहका साथ मनाइने छठ पर्व पछिल्लो समय पहाडी तथा हिमाली क्षेत्रमा समेत विस्तार हुँदै जानुले नेपाली समाजको धार्मिक तथा सांस्कृतिक विविधता र सहअस्तित्वलाई थप मजबुत बनाएको मुख्यमन्त्री आचार्यको भनाइ छ । उहाँले पर्वका माध्यमबाट सामाजिक विभेद, कुरीति र विकृति अन्त्य गर्दै न्यायपूर्ण तथा समतामूलक समाज निर्माणमा सबै प्रतिबद्ध हुनुपर्नेमा जोड दिनुभएको छ ।
मुख्यमन्त्री आचार्यले लुम्बिनी प्रदेश सरकारले मौलिक कला, संस्कृति, भाषा, परम्परा र सम्पदाको संरक्षण तथा प्रवद्र्धनलाई प्राथमिकतामा राखेर विभिन्न कार्यक्रम कार्यान्वयन गरिरहेको पनि उल्लेख गर्नुभएको छ । ‘समृद्ध लुम्बिनी, खुसी नागरिक’ को संकल्प पूरा गर्न सामाजिक सद्भाव, सांस्कृतिक एकता र समावेशी विकासलाई सँगसँगै अघि बढाउने प्रदेश सरकारको प्रतिबद्धता रहेको उहाँले बताउनुभएको छ ।
छठ पर्वले सबैमा सकारात्मक सोच, पारिवारिक सुख, शान्ति र समृद्धिको नयाँ ऊर्जा प्रदान गरोस् भन्दै उहाँले स्वदेश तथा विदेशमा रहेका सम्पूर्ण नेपालीमा सुख, शान्ति, समृद्धि, सुस्वास्थ्य र उत्तरोत्तर प्रगतिको कामना गर्नुभएको छ ।