काठमाडौं । सिन्धुपाल्चोकमा आगो ताप्ने क्रममा घरमा आगलागी हुँदा एक जनाको मृत्यु भएको छ ।

अत्यधिक चिसो बढेसँगै चिसोबाट जोगिन बालेको आगो एक्कासि घरमा आगलागी हुँदा जिल्लाको बाह्रबिसे नगरपालिका-८ का ४५ वर्षीय लोकबहादुर नेपालीको ज्यान गएको हो ।

प्रहरीका अनुसार जस्ताको छाना भएको काठको एक तले घरभित्र आगो ताप्ने क्रममा आगलागी भएको बताइएको छ। घरभित्र आगो लागेपछि खाना पकाउने ग्यासको सिलिण्डर समेत पड्किएको जिल्ला प्रहरी कार्यालय सिन्धुपाल्चोकका सूचना अधिकारी प्रहरी नायब उपरीक्षक (डीएसपी) निरञ्जन भट्टराई जानकारी दिनुभएको छ ।

डीएसपी भट्टराईका अनुसार सोमबार साँझ भएको आगलागीबाट लोकबहादुरको पूरै शरीर जलेर घटनास्थलमै मृत्यु भएको बताउनुभयो। प्रहरीले दिएको जानकारी अनुसार लोकबाहदुरको अरु परिवारका सदस्यलाई प्रहरीले सकुशल उद्धार गरेको थियो ।

प्रहरी र स्थानीयको सहयोगमा आगो नियन्त्रणमा ल्याइएको थियो। प्रहरीले आगलागी बारे अनुसन्धान थालेको बताएको छ । अन्य घरमा भएको क्षतिको विवरण आउन बाँकी रहेको प्रहरीले जनाइएको छ।