अनिल खत्री
गुल्मी । गुल्मी जिल्ला सदरमुकाम तम्घासमा रहेको चन्द्रमा बचत तथा ऋण सहकारी संस्था गुल्मीले १० औं बार्षिक साधारण सभाको अवसरमा जेष्ठ नागरिक, बचतकर्ता र विद्यार्थी सम्मान गरेको छ ।

जिल्लाको सदरमुकाम तम्घासमा एक कार्यक्रमको आयोजना गरी संस्थाले सामुदायिक तथा संस्थागत विद्यालयबाट एसईइ परिक्षामा उत्कृष्ट अंक प्राप्त गर्ने रिया बुचा, दिविसा अर्याल,अनमोल क्षेत्रीलाई सम्मान गरेको छ । त्यस्तै उत्कृष्ट बचतकर्ता तर्फ यमलाल भण्डारी, उत्कृष्ट ऋणी तथा उद्यमी तर्फ झुपा बगाले र जेष्ठ नागरिक सूर्यबहादुर सार्कीलाई नगद र सम्मान पत्रले सम्मान गरेको हो ।

त्यस्तै छरिएर रहेको पुँजीलाई एकीकृत गरेर बचत तथा ऋण मार्फत आर्थिक समृद्धका परिकल्पना गर्ने प्रकाश भलामी संस्थाबाट सम्मानित भएका छन् । १० बर्ष पहिले सदरमुकाम तम्घासमा सेयर सदस्यबाट बचत संकलन र आवश्यक ऋण प्रवाहको लक्ष्य सहित स्थापना भएको सहकारीले जिल्लामा राम्रो काम गरेको जिल्ला सहकारी संघ गुल्मीका अध्यक्ष यम बहादुर थापाले बताउनुभयो ।

भुपु सैनिकहरुले सुरुवात गरेर संचालन गरेको उक्त संस्थाले हालसम्म गरेका कामको प्रशंसा गर्नुभएको छ । अध्यक्ष थापाले केही सहकारीका संचालक र कर्मचारीले गरेको अनियमितता र लापरबाहीका कारण देशका केही सहकारी डुबिरहेको बताउनुभयो ।

उहाँले केही सहकारीका संचालक र कर्मचारीले गरेको बदनामीका कारण समग्रह सहकारीमा नागरिकको विश्वसनीयता घट्दै गएको बताउनुभयो । कार्यक्रमको प्रमुख अतिथि समेत रहेका थापाले सहकारी संचालकमा इमानदारीता र कर्मचारीमा कार्यदक्षता भएमा जस्तोसुकै परिस्थितीको चपेटामा परेपनि सहकारी संस्था अब्बल र सफल हुने उहाँको तर्क छ।

संस्थाको यस चालू आर्थिक बर्षमा चार करोड १३ लाख ६७ हजार ८७ रुपैयाँ ३७ पैसा कुल पूँजी रहेको छ । ८६ लाख ९३ हजार सेयर पुँजी रहेको उक्त संस्थामा दुई करोड ९८ लाख ७४ हजार पाँच सय ३४ रुपैयाँ २८ पैसा बचत रहेको सहकारीले जनाएको छ ।

सहकारी संस्थाले मृत्यु हुने सेयर सदस्यहरुलाई समवेदना कोषबाट रु ५ हजार प्रदान गर्दै आएको छ । भुपु सैनिकले संचालन गरेको उक्त संस्थामा हाल अन्य साधारण सदस्य जोडिएर ६ सय बढी सदस्य रहेका छन् ।