प्यूठान । प्यूठानको बाग्दुला बजार क्षेत्र नजिकैको जंगलमा लागलागी भइरहेको छ । आगोले बजारमा रहेको घर तथा पसल जोखिममा परेका छन् । प्यूठान नगरपालिका–८ स्थित बाग्दुला बजारमा रहेका घर तथा पसल जोखिममा परेपछि आगो नियन्त्रणमा लिन प्रहरी र स्थानीय लागिपरेका छन् ।

प्यूठान नगरपालिकाको दमकलले बजार क्षेत्र नजिकको जंगलमा लागेको आगो निभाउने काम गरिरहेको प्यूठान उद्योग वाणिज्य संघका महासचिव सन्देश आचार्यले बताउनुभयो ।

आगो फैलिन सक्ने जोखिम कायम रहेकाले स्थानीय र प्रहरी तैनाथ अवस्थामा रहेको उहाँले बताउनुभयो । बाग्दुलाका स्थानीय, व्यापारी सवै आगो नियन्त्रणमा लिनका लागि खटिएका छन् ।

आगलागी नियन्त्रणमा लिन जिल्ला प्रहरी कार्यालय प्यूठानका प्रमुख प्रहरी नायव उपरीक्षक इश्वर थापा नेतृत्वको टोली खटिएको छ ।

त्यसैगरी शसस्त्र प्रहरीको टोली समेत आगो नियन्त्रणका लागि खटिएको छ । जिल्लाका विभिन्न जंगलमा लागेको डडेलोले विभिन्न ठाउँमा घरगोठ समेत जलेका छन् ।