काठमाडौं । त्रिभुवन विश्वविद्यालय (त्रिवि)ले स्नातक तहका प्रश्नपत्रहरु नेपाली र अङ्ग्रेजी दुवै भाषामा बनाउने निर्णय भएको छ ।

त्रिभुवन विश्वविद्यालय प्राज्ञिक परिषद् स्थायी समितिको बिहीबार बसेको बैठकले त्रिविबाट लिइने वार्षिक परीक्षा प्रणाली अनुसारका सबै सङ्कायहरूको स्नातक तहका प्रश्नपत्रहरु नेपाली र अङ्ग्रेजी दुवै भाषामा बनाउने निर्णय गरेको हो ।

सो बैठकले आगामी प्रथम वर्षको परीक्षादेखि नै अनिवार्य रूपमा लागू गरी क्रमशः दोस्रो तेस्रो र चौथो वर्षमा समेत लागू गर्ने निर्णय गरेको त्रिविले शुक्रबार जारी गरेको सूचनामा उल्लेख गरिएको छ ।

नेपालमा त्रिभुवन विश्वविद्यालयद्वारा सञ्चालन हुने स्नातक, स्नातकोत्तर लगायत उच्च तहको पढाई तथा प्रश्नपत्र तयार गर्दा नेपाली तथा अंग्रेजी दुबै दुबै भाषामा हुनुपर्ने माग पटकपटक उठ्दै आइरहेको थियो।