रुकुम पश्चिम । रुकुम पश्चिममा ट्याक्टर दुर्घटनामा परि ५ जनाको मृत्यु भएको छ । रा १ त १४ नम्बरको ट्याक्टर बुधबार राती आठबिसकोट नगरपालिका वडा नम्बर १० तिरिकोटमा दुर्घटना हुँदा ५ जनाको मृत्यु भएको प्रहरीले जनाएको छ ।

मृत्यु हुनेमा आठबिसकोट नगरपालिका वडा नम्बर १० का ४६ वर्षीय लोकबहादुर शाही र उहाँको ४२ वर्षीया श्रीमती चुकी शाही, सोही गाउँका ५२ वर्षीया भर्दर सार्की, वडा नम्बर ८ बस्ने ४८ वर्षीय धनराम सार्की र ४७ बर्षीया निर्मला सार्की रहेका छन् ।

दुर्घटनामा परेर पाँच जनाको घटनास्थलमै मृत्यु भएको प्रहरी निरीक्षक खड्काले जानकारी दिनुभयो । मृतकहरूको शव राति ११ बजे आठबीसकोट नगर अस्पतालमा ल्याइएको छ ।

दुर्घटनामा परेर नौ जना घाइते भएका छन् । उनीहरूको आठबीसकोट नगर अस्पतालमा उपचार भइरहेको छ ।

बुधवार राति करिब सवा दश बजे भूकम्प पीडितहरूको अस्थायी टहरा निर्माणको लागि जस्तापाता बोकेर आठबीसकोट नगरपालिका ९ राडिबाट वडा नम्वर ८ को घर्ती गाउँतर्फ जाँदै गरेको ट्याक्टर दुर्घटना भएको प्रहरी निरीक्षक धर्मेन्द्र खड्काले जानकारी दिनुभयो ।